起身第一件事係check下部 notebook 個 Platform SDK 裝完未。事關難得有部 core 2 duo 係手，想試下用 Visual Studio Express 2005黎compile Firefox…可惜攪左個幾鐘頭都唔掂。睇黎要用d唔 official support 既方法 compile Firefox 都有d難度。
係第一晚由 Hyderabad 機場坐車去我住果到時，路經一個商場叫 Hyderabad Central。d印度同事話係呢到黎講呢個算係大商場。於事乎決定今日由鄉下出城去睇睇。
近十點時走出 apartment complex。先行幾步路，去Satyam前拍個照。跟住就開始搵部auto出城。
搵到第一部auto，但係個後生仔司機唔多曉我講咩…算！繼續一路行一路搵車。
行多十幾廿米，截到第二部車。呢個司機肯去 Hyderabad Central，但唔肯用咪錶。一開口就話要一百盧比（大概廿蚊港幣）。我心諗，其實我都唔知落錶去通常係幾錢，但睇你多數都係「掠」我，於事殺佢價：五十啦。佢當然唔肯。講左一輪都唔肯減，於是我唔鬼理佢。有的是時間，繼續行。佢好攪笑，開住部車係我側邊係咁叫「hundred! hundred!」
係呢個時候，有第三部車剷過黎（佢真係剷，唔係講笑）想搶生意。第二部車個司機即刻轉口話八十盧比。我諗呢過時候佢出價都唔會太離譜掛（其實攪咁耐只係差個五蚊港幣 orz）。於是乎上車出發。事後回程時證實，用咪錶的話，八十盧比係差唔多。不過呢個係後話。
一早預左程車唔慌舒服，事關d路好爛。但原來最難頂係d廢氣。條馬路又多車，d氣油又唔慌係高質同無鉛。所以撘完程車之後，成身衫褲由咖喱味變左做廢氣味……
十點半左右到達 Hyderabad Central，不過未開門。唯有沿住條街亂行一陣。行行下見到有座唔知係咪醫院既物體，就走入去兜個圈。見好多人係草地上面坐/訓，唔知係等睇病定係等探病？順帶一提，之前係香港打疫苗時，個醫生話如果大吉利是我要係印度入醫院，記住要去 Apollo Hospital 喎。
兜完個圈出番黎，沿原路番到去商場時，發現已經開左門。
入到去，發覺個格局似百貨公司多d，而個面積仲細過裕華。不過係呢到黎講個環境算係企理，似足西式店鋪。
行左一輪之後有d肚餓，於是跑落去地下間 Pizza Hut 食 lunch。黎左差唔多一個禮拜，終於第一餐唔洗食咖喱或者辣野。叫左客蒜蓉包，細chicken supreme pizza，加支水。埋單 220 盧比（大概四十幾港幣）。
之後係隔離個超市到買左d微波爐餐，就離開個商場，開始我個漫長既歸家之路。
係商場門口有好多auto。今次懶醒，搵個司機肯用咪錶既先上，諗住實掂，點知仲大鍋！
首先，開左車先發現個司機好似完全唔識路，連 Hi-tec City 同 Kondapur 係邊都唔知。Hyderabad 之所以叫印度第二個矽谷，就係因為 Hi-tec City 入面 d 外國 IT 公司，基本上 local 人冇可能唔識。所以我覺得佢係玩野兜路。而 Kondapur 係我住果區，離 Hi-tec City 幾分鐘車程（呢到d街係冇門牌既。所以只可以用地標做目的地……呢樣野係 resident manager 話我知既）。
頭十分鐘車程，佢不停係到講「traffic jam!」跟住又摷張警察證出黎，我唔知佢係想話自己係 part-time 警察定係俾人炒之前係做警察（我希望係後者……）行左十幾分鐘，佢竟然可以兜番去我上車個商場對面！我於是大聲同佢講「Kondapur！」
跟住，個司機每逢見到隔離條行車線有 auto，就大叫「Hi-Tec City! Kondapur!」問路。一塞車，佢就直情係馬路中心熄匙，然落車行過隔離線問路。
玩左大半個鐘，終於都番到我住果到。個咪錶 show 八十三個幾，於是乎俾左八十五蚊個司機。點知佢話之前塞車，叫我俾多d。正常情況之下，我呢類「多一事不如少一事」既人多數會就咁「科水」就算數。但之前俾佢玩左咁耐，條氣實左唔多順。於是乎我同佢就企係到開始講數。
講左幾分鐘，跟住有個「食蕉」哥哥走過黎一齊講，但都係講唔掂。之後「食蕉」哥哥又拉左個路過既住客加入。過左幾分鐘，又有個好好人既妹妹仔走過黎一齊講，之後佢仲搵左佢阿哥join。係呢個時候阿「食蕉」哥哥索性坐上部auto果司機位睇我地繼續講。
係我地成村人講多幾分鐘，d英文同印度話亂飛一輪之後，我個 resident manager 路過加入。我之前話佢有d大佬feel，係唔同d。佢只係用左分幾鐘，用印度話狂轟個司機一輪，個司機就死死氣轉身開車走。而我係散埸同多謝成村人之後亦都上樓抖下。
之後其實發覺我係黎印度之前都冇咩做過 research。於是上台灣個背包攻略 site 睇睇，先發現原來有少有用野。例如飲食指南，觀光指南等等。個印度 forum仲有唔少人分享經驗添。其中我強烈推介印度騙術大觀…睇完真係學唔到野都俾佢笑死！
PS. 夜晚個餐係 resident manager 個度食。甜品係一樣叫 Kheer 既野。阿 RM 話呢樣係印度傳統甜品，通常係印度婚禮都有得食。佢仲話呢個甜品好有營養，如果我食足一個月，包我會有佢咁大隻喎…… orz
No comments:
Post a Comment